མདོ་ཁམས་ཆུ་བཞི་སྒང་དྲུག་གི་ལོ་རྒྱུས་སྙིང་བསྡུས།
མདོ་ཁམས་ཆུ་བཞི་སྒང་དྲུག་ནི། ཕྱི་ལོ་ ༡༩༥༨ ཟླ་ ༦ ཚེས་ ༡༦ ཉིན་མོར་ཨ་འབྲུག་མགོན་པོ་བཀྲ་ཤིས་མཆོག་གིས་དབུས་པའི་མདོ་ཁམས་ཡུལ་གྱི་དང་བླངས་དཔའ་རྒོད་མང་པོས་ལྕགས་ཚ་གྲི་གུ་ཐང་དུ་གསར་འཛུགས་བྱས་པའི་སྒྲིག་འཛུགས་ཤིག་ཡིན་ལ། མདོ་ཁམས་ཀྱི་ཡུལ་ལུང་གི་མིང་ལ་ཆུ་བཞི་སྒང་དྲུག་ཟེར་བ་རྒྱལ་རབས་ལོ་རྒྱུས་ནང་དུ་འབོད་སྲོལ་ཡོད་པ་ལྟར་༸སྐྱབས་རྗེ་ཡོངས་འཛིན་ཁྲི་བྱང་རིན་པོ་ཆེ་མཆོག་གིས་ཚོགས་པའི་མིང་ལ་ཆུ་བཞི་སྒང་དྲུག་ཅེས་བཏགས་གནང་བ་རེད།
ཆུ་བཞི་སྒང་དྲུག་ལ་དམག་སྡེ་ ༢༤ དང་དབུས་ལྷན་ཁང་བསྡོམས་ན་དམག་སྡེ་ ༢༥ ཡོད། བྱང་སྐྱོད་དམག་དཔུང་སྡེ་ཚན་དང་། དམག་སྒར་ཨ་མའི་སྡེ་ཚན་གཉིས་ནས་དགྲ་བོ་དང་འཐབ་འཁྲུག་རིམ་པ་མང་པོ་བརྒྱབ་སྟེ། དམག་འཐབ་བརྒྱུད་རིམ་ནང་དུ་ཕར་དགྲ་དམག་ཆིག་ཁྲི་ཡས་མས་བསད་པ་དང་། ཚུར་རང་དམག་ཆིག་སྟོང་ཡས་མས་སྐུ་སྲོག་ཤོར། ཆུ་བཞི་སྒང་དྲུག་བསྟན་སྲུང་དང་བླངས་དམག་དཔུང་གིས་ལྷོ་ལམ་གཙང་སེལ་བྱས་པའི་རྒྱུ་མཚན་གྱིས་༸རྒྱལ་བ་རིན་པོ་ཆེ་གཙོས་པའི་བོད་ཀྱི་ཆོས་བརྒྱུད་ཁག་གི་བླ་ཆེན་རྣམ་པ་བཙན་བྱོལ་དུ་གདན་ཞུས་དང་། ཇོ་བོ་ཝ་ཏི་བཟང་པོ་གཙོས་རིན་ཐང་བྲལ་བའི་རྟེན་གཙོ་མང་པོ་གདན་ཞུས།
བོད་མི་འབུམ་གཅིག་ཡས་མས་སྐྱབས་བཅོལ་དུ་སླེབས་ཐུབ་པ་སོགས་བྱུང་ཡོད། མཐར་ཛ་སག་དམག་སྤྱི་ཨ་འབྲུག་མགོན་པོ་བཀྲ་ཤིས་མཆོག་གཙོས་དམག་སྤྱི་དང་དམག་མི་འཕྲོས་ལྷག་རྣམས་རྒྱ་གར་དུ་སྐྱབས་བཅོལ་ཞུས་ཤིང་། རིམ་པས་སྒྲིག་འཛུགས་ཀྱི་དམིགས་ཡུལ་དང་དགོས་པ་མ་བོར་བར་གློ་དམག་སྒར་སྒྲིག་འཛུགས་གསར་འཛུགས་ཀྱིས་དགྲ་བོ་ལ་ཕར་རྒོལ་རིམ་པ་མང་པོ་བྱས་པ་དང་། དམག་སྒར་ཨང་ ༢༢ པ་བཅས་གསར་འཛུགས་ཀྱིས་གཞོན་སྐྱེས་རྣམས་ལ་དམག་འཐབ་ཀྱི་སྦྱོང་བརྡར་ཁོར་ཡུག་བསྐྲུན་ཐུབ་པ་བྱུང་ཡོད།
ད་ལྟའི་ཆར་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་རྒྱ་གར་གྱི་རྒྱལ་ས་དྷི་ལིར་ཡོད་པ་དང་། ཨ་རི་དང་། ཨོ་གླིང་། ཁེ་ན་ཌ། ཐེ་ཝན། ཡོ་རོབ། བལ་ཡུལ། རྒྱ་གར་བཅས་སུ་ཆུ་བཞི་སྒང་དྲུག་གི་ས་གནས་ཁག་བཞི་བཅུ་ཞེ་གྲངས་དང་། སྒྲིག་འཛུགས་ཀྱི་ཚོགས་མི་ནི་ཁམས་རིགས་རྒྱ་ཆེའི་མང་ཚོགས་རྣམས་ཡིན།
སྒྲིག་གཞིའི་ནང་རྒྱུན་ལས་མང་མཐའ་ ༡༥ ནས་ཉུང་མཐར་ ༧ བར་ཡོད་ཆོག་པ་ལྟར་ད་ལྟ་རྒྱུན་ལས་མི་གྲངས་ ༡༡ ཡོད། དེའི་ནང་ཚོགས་གཙོ་གཅིག་དང་། ཚོགས་གཞོན་གཉིས། དྲུང་ཆེ། དྲུང་གཞོན། དངུལ་གཉེར། མཐུན་འབྲེལ་འགན་འཛིན། རྒྱུན་ལས་གཞན་བཅས་ཡིན། དོན་གྲུབ་གླིང་དུ་རྒས་གསོ་ཁང་ཞིག་དང། རྡ་སར་ཆུ་སྒང་རིག་གནས་འཛིན་གྲྭ། གཞན་ཡང་ཆུ་སྒང་དགེ་རྩ་ཚོགས་པ། ཆུ་སྒང་ཤེས་ཡོན་སྡེ་ཚན་བཅས་ཡོད། རྒྱ་བལ་གཉིས་དང་ཕྱི་རྒྱལ་ཡུལ་གྲུ་ཁག་བཅས་སུ་ཆུ་སྒང་ས་གནས་ཁག་བཞི་བཅུ་ཞེ་གྲངས་ཡོད་པ་དང་། དེ་དག་གི་རྒྱུན་ལས་རྣམས་ཀྱང་སྒྲིག་དོན་འོས་བསྡུ་བྱེད་བཞིན་ཡོད།
